2016 წლის 4 ივლისი
ავტორი: ნინო გელაშვილი 
Loading ...
18-26 ივნისს კუნძულ კრეტაზე მართლმადიდებელი ეკლესიების წარმომადგენელთა კრება გაიმართა. საქართველოს საპატრიარქო, სხვა რამდენიმე ქვეყნის საპატრიარქოსთან ერთად, კრებას არ დაესწრო.
ქართული ეკლესიის გადაწყვეტილების მიზეზებს და მოსალოდნელ შედეგებს მიეძღვნა „სტუდია რეს” მორიგი ტელედისკუსია.
გადაცემას უძღვება ჟურნალისტი ზვიად ქორიძე. დისკუსიაში მონაწილეობენ თანამედროვე განათლების აკადემიის წარმომადგენელი, თეოლოგი ლევან აბაშიძე, თეოლოგიის დოქტორი, მღვდელი ალექსი ქშუტაშვილი და აიხშტატის უნივერსიტეტის დოქტორანტი, თეოლოგი მირიან გამრეკელაშვილი.
ტელედისკუსიაში მონაწილეობაზე უარი განაცხადეს საქართველოს საპატრიარქოს წარმომადგენლებმა.
გადაცემაში სტუმრებმა განიხილეს ქართული ეკლესიის არგუმენტები იმასთან დაკავშირებით, რომ დოკუმენტებში არის დოგმატური და კანონიკური ცდომილებები. მათი აზრით, საქართველოს საპატრიარქო კრებაზე უნდა წასულიყო და არწასვლის მთავარი მიზეზი მართლმადიდებლურ ეკლესიაში არსებული საინფორმაციო ვაკუუმია.
მირიან გამრეკელაშვილის თქმით, ქართული ეკლესიის არგუმენტები ეფუძნება შიშს და ისინი მოკლებულია როგორც თეორიულ, ასევე პრაქტიკულ ცოდნას.
„საქართველოს ეკლესია მიეჩვია უპასუხისმგებლოდ არსებობას,“- განმარტავს ის. „იგი პასუხისმგებლობას არ გრძნობს არც მრევლის მიმართ, არც ჩვენ ფარგლებს მიღმა არსებული ეკლესიების ნაწილთა მიმართ.”
სტუმრებმა მოსალოდნელ შედეგებზეც ისაუბრეს. მამა ალექსი ქშუტაშვილის აზრით, საფრთხის ქვეშ დგება მართლამდიდებელ ეკლესიებს შორის სამომავლო ურთიერთობის საკითხი.
„სამწუხაროდ, პრაქტიკულად ურთიერთობა უკვე გაგვიფუჭდა არა მარტო კონსტანტინოპოლის საპატრიარქოსთან, ასევე, სხვა ადგილობრივ ეკლესიებთანაც, შეიძლება ითქვას, ათივე საპატრიარქოსთან, რომლებმაც მიიღეს მონაწილეობა ამ კრებაში.”
საეკლესიო განხეთქილების საფრთხეს ვერ ხედავს თეოლოგი ლევან აბაშიძე და თვლის, რომ კრების დასრულების შემდეგ მონაწილე და არამონაწილე ეკლესიებს შორის კომუნიკაცია გაგრძელდება.
