სანდო ინფორმაცია გვაძლიერებს | ანალიტიკა და გამოძიება აღმოსავლეთ ევროპისა და კავკასიის შესახებ

  • მთავარი
  • ჩვენ შესახებ
    • აქტივობები
  • მულტიმედია
    • პოდკასტები
      • დევნილთა ამბები
        • სამეგრელო ზემო-სვანეთი
        • შიდა ქართლი
      • მთავარი მოვლენების მიღმა
      • რადიოჟურნალი ”აქცენტი”
    • ფოტო გალერეა
      • ქართველი ავარელები
      • დროში გაყინული ქალაქი
      • წაშლილი ეთნიკური საზღვრები
      • 2008 წლის აგვისტოს ექო
      • ღია მაცივარი
    • ვიდეო
  • რეგიონული ამბები
    • აზერბაიჯანი
      • წერილები ციხიდან
    • საქართველო
    • სომხეთი
  • წევრები
    • რეგისტრაცია
  • განცხადებები
  • მედია სკოლა
    • მედიის შესახებ
    • სახელმძღვანელოები
  • კონტაქტი

აფხაზეთში აბორტის „ნაჩქარევ“ აკრძალვას აკრიტიკებენ

0 კომენტარი
 2016 წლის 14 მარტი   ავტორი: ანაიდ გოგორიანი

1 Star2 Stars3 Stars4 Stars5 Stars
Loading ... Loading ...


არსებობს შიში, რომ აბორტის აკრძალვა ქალებს პროცედურის არალეგალური გზით ჩატარებისკენ უბიძგებს, რაც ძალიან სარისკოა.

კანონმდებლები სხდომაზე აფხაზეთის პარლამენტში

კანონმდებლები სხდომაზე პარლამენტში (ფოტო: ანაიდ გოგორიანი).

ჯანდაცვის სფეროს წარმომადგენლები მოუწოდებენ აფხაზეთის ხელისუფლებას გადახედოს ახალმიღებულ კანონს აბორტის აკრძალვის შესახებ, რადგან მიაჩნიათ, რომ ის გამოიწვევს არა შობადობის, არამედ ჯანმრთელობასთან დაკავშირებული პრობლემების გაზრდას.

9 თებერვალს აფხაზეთის პრეზიდენტმა რაულ ხაჯიმბამ ხელი მოაწერა ჯანდაცვის შესახებ კანონს, რომლის ერთ-ერთი მუხლით აიკრძალა აბორტი და ორსულობის ხელოვნურად შეწყვეტისთვის სისხლის სამართლის პასუხისმგებლობა დაწესდა.

მიუხედავად იმისა, რომ აფხაზეთის ჯანდაცვის სამინისტრომ წარმოადგინა იმ დაავადებათა ჩამონათვალი, როდესაც აბორტის გაკეთება სამედიცინო ჩვენებით არის დასაშვები, კანონმდებლებმა სამინისტროს წინადადება არ გაითვალისწინეს. ახალი კანონის მიხედვით, აბორტის გაკეთება ნებადართულია მხოლოდ „იმ შემთხვევაში, თუ ნაყოფი აღარ არის ცოცხალი.“

1999-2015 წლებში აბორტების რიცხვმა დაახლოებით 14 000 შეადგინა

კანონის ავტორების და მხარდამჭერების მტკიცებით, ახალი კანონი, გარდა იმისა, რომ ხელს შეუწყობს აფხაზეთში შობადობის გაზრდას, ეთიკურ ასპექტსაც ითვალისწინებს, რაც გულისხმობს სიცოცხლის დაცვას ჩასახვის მომენტიდან.

„ჩვენ ვკრძალავთ ცოცხალი ორგანიზმის მკვლელობას. როგორც დედის სიცოცხლისთვის ვიბრძვით, ასევე უნდა ვიბრძოლოდ არდაბადებული ბავშვის სიცოცხლისთვის,“ – განაცხადა აფხაზეთის პარლამენტის სოციალური პოლიტიკის, შრომის და ჯანდაცვის კომიტეტის თავმჯდომარემ აპოლონ გურგულიამ.

„თუ რამდენიმე ათეულ სიცოცხლეს გადავარჩენთ, ეს უკვე იქნება კანონის დამსახურება. ვფიქრობ, შედეგს მივაღწევთ,“ – დასძინა გურგულიამ. „პარალელურად, სამთავრობო სტრუქტურებმა უნდა იფიქრონ მრავალშვილიანი ოჯახების მატერიალურ წახალისებაზე.“

პარლამენტარი და კანონის ერთ-ერთი ავტორი საიდ ხარაზია აბორტის აკრძალვის თაობაზე კანონის მიღებას თავისი „ფეისბუკის“ გვერდზე ასე გამოეხმაურა: „ეს არის ჯანდაცვის კანონის ყველაზე მნიშვნელოვანი, ყველაზე ჰუმანური, ყველაზე მორალური ნაწილი, რადგან ამ შემთხვევაში სახელმწიფოს კანონი დადგა დაუცველი ბავშვების დასაცავად. ეს კანონი არის სიცოცხლის მხარდამჭერი, რადგან იცავს ყველაზე ძვირფასს რაც გაგვაჩნია – ჩვენს შვილებს!“    

ახალი კანონი პარლამენტმა 29 იანვარს დაამტკიცა. საკანონმდებლო ორგანოს ოცდათხუთი წევრიდან მხოლოდ ორმა – ემა გამისონიამ და ახრა ბჟანიამ არ დაუჭირეს მას მხარი, ორმა კი თავი შეიკავა.

„მიმაჩნია, რომ კანონი ვერ გაამართლებს იმ მოლოდინს, რაც მის მიმართ არსებობს,“ – აცხადებს ერთადერთი ქალი დეპუტატი და ვიცე-სპიკერი ემა გამისონია. „არ შეიძლებოდა ამ კანონისადმი ასე კატეგორიულად მიდგომა. იმედი მაქვს, მიიღებული იქნება კანონქვემდებარე აქტები, რომლითაც არ დაირღვევა ქალთა უფლებები და ზოგადად, არცერთი მოქალაქის უფლება.“

სამედიცინო რისკების არსებობა

აფხაზეთის ჯანდაცვის მინისტრის მოადგილე ბატალ კაცია თვლის, რომ კანონი ალოგიკური და არაპრაქტიკულია.

„აბორტის რამდენიმე ჩვენება არსებობს: სოციალური, სამედიცინო-სოციალური და წმინდა სამედიცინო,“ – განმარტა მან. „ყველა ქვეყანაში, სადაც აბორტი სოციალური მიზეზით არის აკრძალული, არსებობს ჩამონათვალი, როდესაც აბორტი სამედიცინო ჩვენებით არის გამართლებული. ამის არ გათვალისწინება საღ აზრს არის მოკლებული.“

კაცია ასევე აღნიშნავს, რომ კანონის ინიციატორებმა მისი უწყების შენიშვნების იგნორირება მოახდინეს.

„როდესაც მივხვდით, რომ საპარლამენტო კომიტეტში მხარდამჭერს ვერ ვიპოვიდით, ჩვენ პრეზიდენტს და სპიკერის სახელზე გავაგზავნეთ არა მხოლოდ ჯანდაცვის სამინისტროს ოფიციალური პოზიციის წერილი, ასევე აფხაზეთის რესპუბლიკის მეან-გინეკოლოგების მიმართვა,“ -დასძინა მან. „სამწუხაროდ, არც წერილი და არც ჩვენი მიმართვა კანონის მიღების დროს არავინ წაიკითხა. იმედი გვაქვს, რომ მოგვიანებით, შეიტანენ ცვლილებებს და კანონი მიიღებს დასრულებულ სახეს.“

გურგულია აცხადებს, რომ კანონზე მუშაობა სამი წლის განმავლობაში მიმდინარეობდა და ჯანდაცვის სამინისტროს წერილი კანონპროექტის განხილვის სესიის დაწყებამდე ათი წუთით ადრე მიიღო.

„მათ [ჯანდაცვის სამინისტროს] ჰქონდათ შესანიშნავი შესაძლებლობა განევითარებინათ თავიანთი ხედვა არა მარტო აბორტებთან დაკავშირებით, არამედ მთლიანად კანონის შესახებ. კანონპროექტთან დაკავშირებით ყველა წარმოდგენილი წინადადება გავითვალისწინეთ, განვიხილეთ სამუშაო კომიტეტის სამი შეხვედრის დროს, რომელსაც ჯანდაცვის სამინისტროს წარმომადგენლები ესწრებოდნენ,“ – აღნიშნა გურგულიამ.

მისი განცხადებით, არაფერი უჩვეული ამ კანონში არ არის.

„ბევრმა ქვეყანამ მიიღო ასეთი კანონი, როდესაც მათი დემოგრაფიული მდგომარეობა დადგა საფრთხის წინაშე,“ – დასძინა გურგულიამ. „არაფერი დაშავდა იმით, რომ ჩვენ ის ამ ეტაპზე მივიღეთ. პატარა ერი ვართ, რომელმაც სასტიკი ომი გამოიარა. ღარიბ ოჯახებს უფრო მეტი შვილები ჰყავთ, ვიდრე შეძლებულებს. ჩვენი საზოგადოება განიცდის სულიერ დეგრადაციას. სახელმწიფოს ახლა ადამიანური რესურსი ესაჭიროება, ჩვენ კი აბორტების ნებას ვრთავთ. ვისაც უნდა გაკეთება, აფხაზეთის ფარგლებს გარეთ უნდა წავიდეს. ჩვენს სახელმწიფოში, ეს ტაბუა.“

2011 წლის აღწერის მიხედვით, აფხაზეთის მოსახლეობა 240 705 ადამიანს შეადგენს. როგორც კაცია აცხადებს, ყოველ წელს აფხაზეთში საშუალოდ 2 500 ბავშვი იბადება.

„ვისაც უნდა აბორტის გაკეთება აფხაზეთის ფარგლებს გარეთ უნდა წავიდეს. ჩვენს სახელმწიფოში, ეს ტაბუა“

გურგულიას მიხედვით, მხოლოდ 2015 წელს იყო გაკეთებული 800 აბორტი, საერთო ჯამში, 1999-2015 წლებში აბორტების რიცხვმა დაახლოებით 14 000 შეადგინა.

„კარგად ვიცით, რომ არაოფიციალურად, სამჯერ უფრო მეტი აბორტი იქნება გაკეთებული,“ – ამბობს გურგულია. „აქედან მხოლოდ ხუთი პროცენტი არის სამედიცინო ჩვენებით. ექიმებმა პრევენციული ღონისძიებები უნდა ჩაატარონ.“

თუმცა, ბატალ კაცია თვლის, რომ ახლა ექიმები იძულებულები გახდებიან, გაურთულებელ შემთხვევებშიც კი, ქალები აფხაზეთის ფარგლებს გარეთ გააგზავნონ. ბევრი უკვე იმყოფებოდა კიდეც პროცედურის ჩასატარებლად რუსეთში.

„კანონის თანახმად, აბორტი კატეგორიულად არის აკრძალული,“ – აცხადებს კაცია. „იმ შემთხვევაში, თუ ქალის ჯანმრთელობას საფრთხე ემუქრება, მაგალითად, ორსულობის ადრეულ სტადიაზე ონკოლოგიური დაავადება დაუდგინდა, აუცილებელია მკურნალობის ჩატარება, რომლის დროსაც აბორტი უნდა გაკეთდეს, თორემ დაიღუპება დედაც და შვილიც. როგორც აღმოჩნდა, ამ კანონით, ამის უფლება არ გვაქვს. ამ ელემენტარული ლოგიკის მიწოდებას ვცდილობთ. იმედია, რომ ეს გაუგებრობა მალე იქნება აღმოფხვრილი. კანონში შესწორებების შეტანა აუცილებელია, რადგან სხვაგვარად უბრალოდ არ შეიძლება,“ – დაასკვნა კაციამ.

მეან-გინეკოლოგი ფატიმა ხარზალია სოხუმის ერთ-ერთ კერძო კლინიკაში მუშაობს. პირადი მოსაზრებების გამო აბორტებს უკვე წლებია აღარ აკეთებს. თუმცა, ისიც მიიჩნევს, რომ კანონზე სათანადოდ არ უფიქრიათ.

მისი განმარტებით, დემოგრაფიული მდგომარეობის გამოსწორების ნაცვლად, შეიქმნება უამრავი პრობლემა, რომელთა მოგვარებასაც სახელმწიფო ვერ შეძლებს. ეს არის კრიმინალური აბორტები, რომლებიც ხშირად მთავრდება სხვადასხვა ქრონიკული დაავადებებით და ზოგჯერ, ქალის გარდაცვალებითაც. ასევე გასათვალისწინებელია არასასურველი ორსულობა, მიტოვებული და დაუგეგმავი ბავშვების საკითხიც.

„ვფიქრობ, კანონი ნაჩქარევია,“ – აცხადებს ხარზალია. „ყველაზე რადიკალური ისლამური ქვეყნებიც კი ამ საკითხთან დაკავშირებით უფრო მოქნილები არიან. ამ საკითხის გადაწყვეტა აუცილებელია პროფესიონალებთან კონსულტაციების საფუძველზე.“

მისი სიტყვებით, არცერთი ქალი არ შეწყვეტს ორსულობას, მხოლოდ საკუთარი კომფორტიდან გამომდინარე.

„ქალს, რომელსაც არ უნდა ბავშვის ყოლა, რომელიც მივიდა ისეთ რთულ გადაწყვეტილებამდე , რომ შეიწყვიტოს ორსულობა, კანონი ვერ შეაჩერებს. ეს კანონი ორსულობის შეწყვეტას უკრძალავს ექიმებს, ამიტომ ჯანმრთელობასთან დაკავშირებული პრობლემების ცვენა გველოდება,“ – ამბობს ხარზალია.

კონტრაცეპტივების გამოყენება აფხაზეთში არც ისე პოპულარულია, დასძინა მან, ნაწილობრივ, მათი სიძვირის გამო.

მრავალშვილიანი ოჯახების მხარდაჭერა

პრეზიდენტთან არსებული საკონსულტაციო ჯგუფის, აფხაზეთის საზოგადოებრივი პალატის მდივანი ნათელა აკაბა წუხილით აღნიშნავს, რომ სახალხო კრების დეპუტატებმა კანონის მიღებამდე არ ჩათვალეს საჭიროდ საზოგადობრივი აზრის გამოკითხვის ჩატარება.  

აბორტის ამკრძალავი კანონი მედიკოსების, საზოგადო მოღვაწეების და არასამთავრობო ორგანიზაციების ხელმძღვანელების პროტესტის მიუხედავად მაინც მიიღეს.

„პარლამეტის წევრებს სხვადასხვა საზოგადოებივ ორგანიზაციებთან რომ ჩაეტარებინათ კონსულტაციები, შობადობის გაზრდისთვის გაცილებით უფრო ეფექტური გზებს გამონახავდნენ, ვიდრე აბორტის აკრძალვაა,“ – განაცხადა აკაბამ.

„ეს მეთოდები კარგად არის ცნობილი და დროში გამოცდილი – ახალგაზრდა ოჯახების მხარდაჭერა, მომავალ დედაზე ზრუნვა, გარანტირებული უფასო მშობიარობა, ფულადი დახმარება მეორე და ყოველი მომდევნო შვილის შეძენის შემთხვევაში.“

ამჯამად, სახელწიფო პირველი და მეორე შვილის შეძენის დროს ოჯახებს 50 000 (1700 ლარი) რუბლით უზრუნველყოფს.

თუ ოჯახში არის სამი ან ხუთ შვილი, თითოეული მათგანი თვეში 500 (17 ლარი) რუბლს იღებს. ოჯახებისთვის, სადაც შვიდი ან ცხრა შვილია ყოველთვიური დახმარება 750 (25 ლარი) რუბლს შეადგენს, ხოლო ცხრა და მეტი ბავშვის შემთხვევაში სახელმწიფო თითოეულისთვის 1000 (35 ლარი) რუბლს გამოყოფს.

პარლამენტის სპიკერმა ვალერი ბგანბამ 10 თებერვალს ჟურნალისტებს განუცხადა, რომ პარლამენტი მუშაობს მრავალშვილიანი ოჯახების სოციალური და ფინანსური დახმარებების მიმართულებით. ერთ-ერთ ასეთ საშუალებად განიხილება მესამე შვილის შეძენის შემთხვევაში ოჯახისთვის 100 000 (3500 ლარი) რუბლის ოდენობის ფულადი დახმარების გადაცემა.

როგორც კაცია აღნიშნავს, მხოლოდ ასეთი მხარდამჭერი ზომებით არის შესაძლებელი ოჯახების სიდიდეზე გავლენის მოხდენა. მისივე სიტყვებით, ჯანდაცვის სამინისტროს მიერ ჩატარებული კვლევის მიხედვით, ნებისმიერი ქალი სიხარულით გააჩენს უფრო მეტ შვილს, თუ ის უზრუნველყოფილი იქნება.

„ეს არის ერთადერთი გზა შობადობის სტიმულირებისთვის,“ – განაცხადა კაციამ. „მნიშვნელოვანი სოციალური საკითხები არასოდეს მოგვარებულა ამკრძალავი ზომებით.“

ანაიდ გოგორიანი

სტატია შეიცავს თვითაღიარებულ რესპუბლიკაში დამკვიდრებულ ტერმინოლოგიას და სახელწოდებებს.

გააზიარე:

  • Click to share on X (Opens in new window) X
  • Click to share on Facebook (Opens in new window) Facebook
    გააზიარე

ავტორი ანაიდ გოგორიანი
IWPR-ის მიერ გადამზადებული ჟურნალისტია. ის ასევე გაზეთ ჩეგემსკაია პრავდას და რადიო ეხოკავკაზას თანამშრომელია აფხაზეთში.


  • სახელმძღვანელოები

    • ნიუსრუმი დეზინფორმაციის...
      აპრილი 23, 2021
    • მედიის სახელმძღვანელო...
      აგვისტო 17, 2020
    • ანტიპროპაგანდული სახელმძღვანელო
      ივლისი 9, 2018
    • მშვიდობის გაშუქების...
      მარტი 26, 2016
    • როგორ დავწეროთ სტატიის...
      მარტი 26, 2016

  • დაგვიმეგობრდით Facebook-ზე

  • ძებნა

  • არქივები

  • 2008 წლის რუსეთ საქართველოს ომი EUMM IWPR ადამიანის უფლებები აზერბაიჯანი არმენ კარაპეტიანი არშალუის მგდესიანი არჩევნები აფგან მუხტარლი აფხაზეთი განათლება განცხადებები დევნილები ევროკავშირი ეკატერინა პოღოსიანი ეკონომიკა ვაჰე ჰარუტუნიანი თურქეთი ილჰამ ალიევი ირანი კავკასია კონფლიქტი კორუფცია ლგბტ მედია მთიანი ყარაბაღი ნურგულ ნოვრუზი ომი პოლიტპატიმრები ჟურნალისტიკა რუსეთი რჩეული სამირა აჰმედბეილი სამხრეთ ოსეთი საპრეზიდენტო არჩევნები საქართველო სერჟ სარგსიანი სირია სიტყვის თავისუფლება სომხეთი ტრენინგი ქალები ქალთა უფლებები შაჰლა სულთანოვა ჯანდაცვა




Institute for War and Peace Reporting | ომისა და მშვიდობის გაშუქების ინსტიტუტი | © 2007-2022

CREATIVE COMMONS–ის ლიცენზია
ვებგვერდის ფორმა და შინაარსი დაცულია Creative Commons-ის არაკომერციული 4.0 საერთაშორისო ლიცენზიის ფარგლებში
.

ჩვენ ვიყენებთ ქუქი ჩანაწერებს. თქვენი პარამეტრების დამახსოვრებით ჩვენ გაწვდით საუკეთესო მომსახურებას განმეორებითი ვიზიტების დროს. "თანახმა ვარ" ღილაკზე დაჭერით თქვენ გასცემთ ქუქი ჩანაწერების გამოყენების ნებართვას. თუმცა "პარამეტრები" ფუნქციით თქვენ შეგიძლიათ გააკონტროლოთ თქვენს მიერ ნებადართული მონაცემების გაზიარება. მეტი ინფორმაციისთვის იხილეთ სტატიები: ჩვენს მიერ გამოყენებული ქუქი ჩანაწერები | ინტერნეტის ისტორია.
პარამეტრებითანახმა ვარ
Manage consent

Privacy Overview

This website uses cookies to improve your experience while you navigate through the website. Out of these, the cookies that are categorized as necessary are stored on your browser as they are essential for the working of basic functionalities of the website. We also use third-party cookies that help us analyze and understand how you use this website. These cookies will be stored in your browser only with your consent. You also have the option to opt-out of these cookies. But opting out of some of these cookies may affect your browsing experience.
Necessary
Always Enabled
Necessary cookies are absolutely essential for the website to function properly. These cookies ensure basic functionalities and security features of the website, anonymously.
Functional
Functional cookies help to perform certain functionalities like sharing the content of the website on social media platforms, collect feedbacks, and other third-party features.
Performance
Performance cookies are used to understand and analyze the key performance indexes of the website which helps in delivering a better user experience for the visitors.
Analytics
Analytical cookies are used to understand how visitors interact with the website. These cookies help provide information on metrics the number of visitors, bounce rate, traffic source, etc.
Advertisement
Advertisement cookies are used to provide visitors with relevant ads and marketing campaigns. These cookies track visitors across websites and collect information to provide customized ads.
Others
Other uncategorized cookies are those that are being analyzed and have not been classified into a category as yet.
SAVE & ACCEPT