2017 წლის 14 თებერვალი
ავტორი: რეგიონული მედიის ქსელი 
Loading ...
სახელმწიფო მანკიერ პრაქტიკას საკანონმდებლო ნაბიჯებით და ცნობიერების ამაღლებით უპირისპირდება.
გოგონების წინადაცვეთის პროცედურას ყვარლის რაიონის სამ სოფელში თივში, სარუსოსა და ჩანთლისყურეში ატარებენ (ფოტო: აიდა მირმაკსუმოვა).
საქართველოს მთავრობის და უფლებადამცველი ორგანიზაციების წარმომადგენელთა განხადებით, მათ საქართველოში ასეთი პრაქტიკის არსებობის შესახებ არაფერი იცოდნენ.
სტატიის მიხედვით, ყვარლის რაიონში, ეთნიკური ავარელებით დასახლებულ სოფლებში, წინადაცვეთის პროცედურა ბავშვობაში ასობით გოგონას უტარდება. (იხილეთ: საქართველში გოგონათა წინადაცვთის ფაქტები გამოვლინდა).
2016 წლის ნოემბერში გამოქვეყნებულ სტატიას დაუყოვნებლივ გამოეხმაურნენ სახელმწიფო უწყებები, კერძოდ, პრემიერ-მინისტრ გიორგი კვირიკაშვილის აპარატი.
„პირველი, რაც გავაკეთე, იყო ის, რომ შევხვდი არასამთავრობო ორგანიზაციების, გაეროს და IWPR-ის წარმომადგენლებს, იმისთვის, რომ უფრო მეტი ინფორმაცია მიმეღო ამ პრაქტიკის შესახებ,“ – განაცხადა პრემიერ-მინისტრის მრჩეველმა ადამიანის უფლებათა და გენდერული თანასწორობის საკითხებში სოფო ჯაფარიძემ. „მინდოდა უფრო მეტი გამეგო, სხვა ქვეყნების გამოცდილების შესახებ, როგორ უმკლავდებიან ისინი ამ პრობლემას, რათა შესაბამისად დაგვეგეგმა სამომავლო ღონისძიებები.
„ასევე შევხვდი სხვადასხვა სახელმწიფო უწყებების წარმომადგენლებს, სადაც განვიხილეთ მოკლე და გრძელვადიანი გეგმები აღნიშნულ საკითხთან დაკავშირებით,“ – დასძინა მან.
საქართველოს იუსტიციის სამინისტრომ მოამზადა ცვლილებების პაკეტი, რომელიც საქართველოს კანონმდებლობის ევროპის საბჭოს სტამბოლის კონვენციასთან შესაბამისობაში მოყვანას გულისხმობს. ამ კონვენციის მიხედვით, ქალთა წინადაცვეთა დასჯადი ქმედებაა. ცვლილებების დამტკიცება პარლამენტის უახლოეს სესიაზე უნდა მოხდეს.
ამის პარალელურად, რელიგიურ საკითხთა სახელმწიფო სააგენტოს წარმომადგენლები ჩავიდნენ სამივე სოფელში, სადაც შეხვდნენ ადგილობრივ სასულიერო პირებს და იმყოფებოდნენ რამდენიმე ოჯახში.
შერიგებისა და სამოქალაქო თანასწორობის საკითხებში სახელმწიფო მინისტრის აპარატის ორგანიზებით თივის საჯარო სკოლაში მოეწყო შეხვედრა მოსწავლეებსა და მასწავლებლებთან.
ჯანდაცვის სამინისტროს ინიციატივით გოგონათა წინადაცვეთისა და მასთან დაკავშირებული რისკების შესახებ დაიბეჭდა ბროშურა.
სოფო ჯაფარიძემ ხაზგასმით აღნიშნა, რომ ქალთა წინადაცვეთის საკითხთან დაკავშირებით დიდი სიფრთხილის გამოჩენაა საჭირო.
„ეს ძალიან მგრძნობიარე საკითხია და სახელმწიფოს მხრიდან ფრთხილ მიდგომას საჭიროებს,“ – განაცხადა მან. „ეს აუცილებელია იმისთვის, რომ თავიდან ავირიდოთ ისეთი არასასურველი შედეგები, როგორიცაა პრაქტიკის უარყოფა და მისი იატაკქვეშ გადანაცვლება.“
მისივე სიტყვებით, პირველი ნაბიჯი არის ცნობიერების ამაღლება.
„ჩვენ უზრუნველვყოფთ, რომ თემის წევრებს მივაწოდოთ ინფორმაცია ამ პრაქტიკის თანმხლები გართულებების შესახებ, როგორც სამედიცინო, ასევე სამართლებრივი თვალსაზრისით. იმედი გვაქვს, რომ კანონმდებლობისა და კვალიფიცირებული სპეციალისტების დამხარებით შევძლებთ გოგონათა წინადაცვეთის პრაქტიკის პრევენციას“.
ავარელების უმეტესობა თვლის, რომ წინადაცვეთის რიტუალი მათი ტრადიციის განუყოფელი ნაწილია (ფოტო: აიდა მირმაკსუმოვა).
„სტატიამ საზოგადოების ყურადღება მიაპყრო საქართველოში ქალთა და გოგონათა მიმართ ძალადობის გამოვლენის არა ფართოდ გავრცელებულ, თუმცა უკიდურესად სასტიკ ფორმას, რომელიც ვერაფრით ვერ იქნება გამართლებული ვერანაირი „ტრადიციით,“ – განაცხადა გაეროს ქალთა ორგანიზაციის წარმომადგენელმა საქართველოში ერიკა კვაპილოვამ.
„ცნობიერების ამაღლება ქალთა წინადაცვეთის, როგორც ძალადობის უკიდურესი ფორმის შესახებ, ასევე საგანმანათლებლო ღონისძიებები იმის შესახებ, თუ რა გართულებებს იწვევს წინადაცვეთა გოგონათა და ქალთა ჯანმრთელობის თვალსაზრისით, ისეთივე მნიშვნელოვანია, როგორც პრაქტიკის კანონით აკრძალვა.“
კვაპილოვამ აღნიშნა, რომ სახელმწიფო უწყებები, ისევე როგორც სახალხო დამცველის აპარატი, განსაკუთრებული სერიოზულობით მოეკიდნენ ამ საკითხს.
„სახალხო დამცველი იმყოფებოდა ადგილზე, სადაც ადგილობრივ მცხოვრებლებთან და სამედიცინო დაწესებულებების პერსონალთან საუბრისას მას დაუდასტურეს, რომ აქაურ გოგონებს უტარებდნენ ე.წ. „ნათლობის“ რიტუალს,“ – განაცხადა მან.
„სახალხო დამცველმა გაავრცელა განცხადება, რომელშიც დაგმო ეს პრაქტიკა, როგორც ძალადობის გამოვლენის უკიდურესი ფორმა და ადამიანის უფლებათა დარღვევა, რომელიც უარყოფითად მოქმედებს, როგორც ადამიანის ჯანმრთელობაზე ასევე მის პიროვნულ კეთილდღეობაზე. განცხადებას მოჰყვა განხილვა ჯანდაცვის სამინისტროს სპეციალისტებთან, რომლებმაც ხაზგასმით აღნიშნეს, რომ პრობლემის ეფექტურად მოგვარებისთვის აუცილებელია საგანმანათლებლო კუთხით მუშაობა, იმის ახსნა, თუ რა ზიანს აყენებს ქალის ჯანმრთელობას წინადაცვეთა.
„საკითხს სრული სერიოზულობით მოეკიდა საქართველოს ხელისუფლება, ისევე როგორც, სამოქალაქო საზოგადოების პარტნიორები, რომლებიც საქართველოში ქალთა მიმართ ძალადობის წინააღმდეგ იბრძვიან,“ – დასძინა კვაპილოვამ.
2016 წლის დეკემბერში, საქართველოს ჟურნალისტური ეთიკის ქარტიამ და გაეროს ქალთა ორგანიზაციამ, „ქალთა უფლებების სფეროში მნიშვნელოვანი პრობლების გამოვლენისთვის,“ სტატიის ავტორი აიდა მირმაკსუმოვა სპეციალური პრიზით დააჯილდოვა.
საქართველოს ჟურანალისტური ეთიკის ქარტიის აღმასრულებელი დირექტორის, ნატალია ძველიშვილის განმარტებით, ჟიურიმ აიდა მირმაკსუმოვასთვის სპეციალური პრიზის გადაცემა იმიტომ გადაწყვიტა, რომ „ამ შემთხვევების [გოგონათა წინადაცვეთის] შესახებ არავინ არაფერი იცოდა.“
„ეს ნამუშევარი საფუძვლად დაედო ქალთა საკითხების შესახებ ძალიან მნიშვნელოვან დისკუსიას არამარტო საზოგადოებაში, არამედ ხელისუფლების წარმომადგენლებსა და პრემიერ-მინისტრს შორის,“ – განაცხადა მან. „როგორც ჩვენთვის ცნობილია, ამ საგამომძიებლო სტატიას მოჰყვა საკანონმდებლო ცვლილებები. ამიტომაც, ჟიურის გადაწყვეტილებით, სწორედ ეს ნაშრომი გახდა 2016 წლის ყველაზე მნიშვნელოვანი და გავლენიანი სტატია.“
