Loading ...

24 თებერვალს, ქალაქ ზუგდიდში ომისა და მშვიდობის გაშუქების ინსტიტუტის (IWPR) ორგანიზებით გაიმართება ტრენინგი გაეროს უშიშროების საბჭოს რეზოლუცია 1325-ის, მშვიდობის მშენებლობის, ადამიანის უფლებებისა და ტოლერანტობის თემებზე.

ტრენინგში მონაწილეობას მიიღებენ IWPR სამოქალაქო ჟურნალისტიკის ხელშეწყობის და განვითარების პროექტში ჩართული სამეგრელო-ზემო სვანეთის რეგიონში მცხოვრები ახალგაზრდა დევნილი ლიდერები და ადგილობრივი უმაღლესი სასწავლებლების ჟურნალისტიკის ფაკულტეტის სტუდენტები.

ტრენინგს გაუძღვება ექსპერტი მშვიდობის მშენებლობის საკითხებში ქალბატონი მანანა მებუკე. შეხვედრის მონაწილეები მიიღებენ ინფორმაციას ადამიანის უფლებების შინაარსსა და მნიშვნელობაზე, მასლოუს მოთხოვნილებათა პირამიდაზე, მრავალარხიან დიპლომატიაზე, მშვიდობის მშენებლობის პროცესში ქალის როლზე და გაეროს უშიშროების საბჭოს რეზოლუციების 1325, 1820, 1888, 1889, 1960 ძირითდ პრინციპებზე.

შეხვედრის მონაწილეები იმსჯელებენ  საზოგადოებაში ტოლერანტული ცნობიერების,  დემოკრატიული ღირებულებების არსსა და მნიშვნელობაზე.

პროექტის მონაწილე დევნილი ლიდერებისთვის ომისა და მშვიდობის გაშუქების ინსტიტუტი 2010 წლიდან ინტენსიურად ახდენს ტრენინგების ორგანიზებას, ორი წელია რაც დევნილი რეპორტიორები იძულებით გადაადგილებულ პირთა პრობლემების ამსახველ რადიოჟურნალ დევნილთა ამბებს, თვეში ერთხელ ამზადებენ. რადიოჟურნალი რეგიონული რადიოების თრიალეთის, ათინათის, ძველი ქალაქის, ჰერეთის, ჰარმონიის ეთერში ტრანსლირდება. გადაცემის აუდიო ჩანაწერის მოსმენა შესაძლებელია ვებგვერდზე www.reporter.ge.

ტრენინგი პროექტის Building Bridges/Building Capacity in the South Caucasus ფარგლებში ტარდება, ნორვეგიის საგარეო საქმეთა სამინისტროს მხარდაჭერით.

დამატებითი ინფორმაციისთვის დაუკავშირდით გიორგი კუპატაძეს, giorgi@iwpr.net (+995 595 909337)  ან თეა შონიას (+995 591 118086).

IWPR–ის შესახებ:

ომისა და მშვიდობის გაშუქების ინსტიტუტი არის არასამთავრობო ორგანიზაცია, რომელიც კონფლიქტურ და კრიზისულ რეგიონებში მუშაობს მედიის განვითარებისა და თავისუფალი სიტყვის ხელშეწყობისათვის. ცხრა რეგიონული პროგრამის ფარგლებში IWPR პროექტებს ოცზე მეტ ქვეყანაში ახორციელებს (www.iwpr.net).