Loading ...

16 ივნისს „სტუდია რე“-ს მორიგი ტელედისკუსია გაიმართა სიძულვილის ენის შესახებ კონფლიქტების გაშუქებისას.

გადაცემაში მონაწილეობდნენ “სტუდია რე”-ს დირექტორი, მამუკა ყუფარაძე, ომისა და მშვიდობის გაშუქების ინსტიტუტის რეგიონული დირექტორი, ბექა ბაჯელიძე,  არასამთავრობო ორგანიზაცია, “კავკასიური მოზაიკა”-ს პროექტების ხელმძღვანელი ნინო პოპიაშვილი და  კოალიცია დევნილთა უფლებებისათვის, ხელმძღვანელი ზურაბ ბენდიანიშვილი.

გადაცემაში Skype-ს მეშვეობით ჩაერთო გოგა აფციაური, რადიო თავისუფლების კორესპონდენტი გორიდან და ნანა ხუბუტია საინფორმაციო პორტალ Livepress-ს ჟურნალისტი ზუგდიდიდან.

სტუმრებმა აღნიშნეს, რომ ქართულ მედიაში კონფლიქტები იშვიათად და ზედაპირულად შუქდება. ჟურნალისტები ხშირად მხოლოდ ოფიციალური პირების განცხადებების გავრცელებით შემოიფარგლებიან. საქართველოს მოსახლეობას არ აქვს ინფორმაცია  აფხაზეთსა და სამხრეთ ოსეთში მიმდინარე ამბების შესახებ. ქართველ ჟურნალისტებს არ ჰყავთ წყაროები ამ რეგიონებში.  ამ მხრივ, გამონაკლისია მედიაორგანიზაციები, რომლებიც უშუალოდ აფხაზეთისა და სამხრეთ ოსეთის მოსაზღვრე რეგიონებში მუშაობენ.

დაკვირვება აჩვენებს, რომ მედია ხშირად არის საზოგადოებაში არსებული სტერეოტიპების და სიძულვილის ენის გამავრცელებელი. ქართულ პრესაში ჯერ კიდევ შეხვდებით აფხაზების მიმართ დისკრიმინაციულ გამონათქვამებს, რომ ისინი არიან „მოსულები“, სეპარატისტები, ქართველთმოძულეები.

დისკუსიაში აღინიშნა, რომ თავის მხრივ, აფხაზური და ოსური მედია არ ინტერესდება საქართველოში მიმდინარე ამბებით. აფხაზურმა მედიამ თითქმის არ გააშუქა 19 მაისს სოფელ ხურჩაში გიგა ოთხოზორიას მკვლელობის ფაქტი.

 „სტუდია რე“ აპრილიდან ყველაზე რეიტინგულ ქართულ, აფხაზურ და ოსურ მედიაში კონფლიქტების გაშუქებას აკვირდება. კვლევის დეტალური შედეგები ივლისის ბოლოს გამოქვეყნდება.

„სიძულვილის ენა მედიაში“ არის ამ პროექტის ფარგლებში მომზადებული მეორე ტელედისკუსია. პირველი გადაცემა შეგიძლიათ იხილოთ ბმულზე http://bit.ly/28XWvHJ

ნინო გელაშვილი