Loading ...

ინციდენტების პრევენციის და მათზე რეაგირების მექანიზმის სამუშაო ჯგუფის 22-ე  შეხვედრა ერგნეთში მილოცვებით და დამშვიდობებით დაიწყო. შეხვედრის მონაწილეები ოსური დელეგაციის ხელმძღვანელს მერაბ ჩიგოევს, დეფაქტო რესპუბლიკის გენერალურ პროკურორად დანიშვნას ულოცავდნენ და შეხვედრის ფორმატიდან ემშვიდობებოდნენ.

გადაცემა დევნილთა ამბების  23-ე  გამოშვება, შიდა ქართლი

ავტორი: გოგა აფციაური

ევროკავშირის სადამკვირვებლო მისიის მონიტორები მოლაპარაკებების კარვის წინ ერგნეთში (ფოტო: გოგა აფციაური)

მოისმინეთ:

ჩიგოევმა შეხვედრის ბოლოს განაცხადა, რომ მას გაწონასწორებული და განათლებული პირი შეცვლის, რომელიც ქართულ–ოსურ მოლაპარაკებეში გარკვეულია, თუმცა შემცვლელის გვარი არ დაუსახელებია. რაც შეეხება შეხვედრის დღის წესრიგს. დასაწყისში ცნობილი გახდა, რომ სოფელ ტახტისძირში რუსმა მესაზღვრეებმა ადგილობრივი მწყემსი დააკავეს და ნახირი ოკუპირებულ ტერიტორიაზე გადაიყვანეს, ამ ინციდენტზე რეაგირება ოპერატიულად მოხდა და შეხვედრის მიმდინარეობისას მწყემსიც და საქონელიც სოფელში დააბრუნეს.

ქართული დელეგაციის ხელმძღვანელმა შოთა უტიაშვილმა წინათ დაპატიმრებული 4 ქართველის და რამდენიმე დღის წინ სოფელ კნოლევთან დაკავებული, ადგილობრივი მცხოვრების ზვიად კობერიძის გათავისუფლება მოითხოვა. აღსანიშნავია, რომ ამ დაკავების შემდეგ კობერიძეს მეუღლე გარდაეცვალა. შინაგან საქმეთა სამინისტროს ანალიტიკური ცენტრის ხელმძღვანელს შოთა უტიაშვილს მერაბ ჩიგოევმა მას პირობა მისცა, რომ კობერიძის საკითხში გაერკვევა და მისი გათავისუფლება უახლოეს დღეებში მოხდება.

მხარეები ასევე შეთანხმდნენ, რომ ეგრეთ წოდებული გამყოფი ხაზის გასწვრივ არსებულ მიწის ნაკვეთებზე განაღმვითი სამუშაოები დაიწყება. მხარეები იქ შესული გამნაღმველების უსაფრთხოების გარანტიებს იძლევიან. ბოლო პერიოდში ახალგორის მიმდებარე ტერიტორიაზე არაერთი ნაღმი ამოქმედდა, რამაც მშვიდობიანი მოქალაქეებში მსხვერპლი გამოიწვია. უტიაშვილის განცხადებით, ამ საკითხზე შეთანხმება უპრობლემოდ მოხერხდა.

შეხვედრის დასასრულს ოსური დელეგაციის ხელმძღვანელმა მერაბ ჩიგოევმა ქართველ და ოს ჟურნალისტებთან შეხვედრის შესახებ კომენტარი გააკეთა და ის პოზიტიურად შეაფასა, მისი თქმით ბოლო პერიოდში საზღვრის უკანონოდ გადაკვეთის ფაქტები მნიშვნელოვნად შემცირდა. ერთი თვის განმავლობაში ასეთი 15 ფაქტი დაფიქსირდა და დაკავებულთა უმრავლესობა დაჯარიმებული და გათავისუფლებულია, ოსური მხარე ქართულ მხარეს საქართველოს ციხეებში მყოფი, 26 ოსი ეროვნების მოქალაქის სასჯელების გადახედვისკენ მოუწოდებს. ზოგიერთ მათგანს სამუდამო პატიმრობა აქვს მისჯილი.

მერაბ ჩიგოევმა ერგნეთში ბაზრობის გახსნის იდეაზეც ისაუბრა, ეს ინიციატივა დეფაქტო რესპუბლიკის ახლადარჩეულმა პრეზიდენტმა ლეონიდ თიბილოვმა ერთხელ უკვე გააჟღერა. ჩიგოევის აზრით, თავის დროზე ბაზრობის დახურვა დიდი სისულელე იყო და თუ ქართულ მხარესთან შეხების წერტილს იპოვის, ოსური მხარე ამ საკითხს ერგნეთის მომავალი შეხვედრებისთვის მოამზადებს. ამ ინიციატივის შესახებ ქართულ მხარეს ჯერ ჩამოყალილებული პოზიცია არ გააჩნია, უტიაშვილის აზრით ქართული პოზიცია ოსური მხარის წინადადების გაცნობის შემდეგ დაფიქსირდება.

ოსური მხარის ინიციატივის შესახებ ერგნეთში, ადგილობრივი მოსახლეობისთვის უკვე ცნობილია, ლია ჩლაჩიძის აზრით ბაზრობის გახსნით არამარტო ადგილობრივი მოსახლეობის სოციალური მდგომარეობა გაუმჯობესდება, არამედ გამყოფი ხაზის სხვადასხვა მხარეს მცხოვრებ ადამიანებს შორის ნდობის აღდგენაც დაიწყება. “ორივე მხარეს საზღვრისპირა სოფეში მცხოვრები მოსახლეობა მზადაა აღდგეს ბაზარი. მე ვფიქრობ, რომ ერგნეთის ბაზრობის აღდგენა აუცილებელია,”-განაცხადა ლია ჩლაჩიძემ.

ოსური მხარე ერგნეთის ბაზრობის საკითხზე მას შემდეგ გააქტიურდა, რაც როკის გვირაბი სარემონტო სამუშაოებისთვის დაიკეტა, ცხინვალში ვარაუდობენ, რომ სავენტილაციო გვირაბის გრაფიკით მუშაობა დეფაქტო რესპუბლიკის დედაქალაქში პროდუქციის დეფიციტს შექმნის, რაც ფასების ზრდას გამოიწვევს, ინციდენტების პრევენციის მექანიზმის სამუშაო ჯგუფის შეხვედრა ერგნეთში 25 მაისს გაიმართება.