Loading ...

დისკუსიის მონაწილეებმა ისაუბრეს იმაზე, თუ რამდენად არის მოსალოდნელი არსებული დაძაბულობის კიდევ უფრო გამწვავება.

სომხეთ-აზერბაიჯანის საზღვარზე ბოლო დროს გახშირებული სროლები ორივე ქვეყანაში შეშფოთების მიზეზი ხდება. ანალიტიკოსები ბჭობენ იმაზე, თუ რამდენად დროებითია ეს მოვლენა ან ხომ არ არის ის უფრო სერიოზული დაპირისპირების დასაწყისი.

იანვრის ბოლოს ყარაბაღის საზღვრის მიმდებარედ მიმდინარე სროლებს უმსხვერპლოდ არ ჩაუვლია. მიუხედავად იმისა, რომ დაღუპულების შესახებ ოფიციალური  მონაცემები არ გამოქვეყნებულა, სომხეთის ხელისუფლება 19 და 28 იანვარს ორი ჯარისკაცის სიკვდილს ადასტურებს, აზერბაიჯანის მხარე კი 23 და 27 იანვარს ორი სამხედროს მოსამსახურის დაღუპვის შესახებ საუბრობს.

1994 წელს მიღწეული ცეცხლის შეწყვეტის შესახებ შეთანხმების დარღვევის ფაქტებს ადრეც არაერთხელ ჰქონია ადგილი, თუმცა ამ ბოლო დროს განვითარებულმა მოვლენებმა სომეხი და აზერბაიჯანელი ექსპერტები განსაკუთრებით დააფიქრა.

დისკუსია 30 იანვარს ერევნის მედია ცენტრში გაიმართა და მას აზერბაიჯანელი მონაწილეები ვიდეო ხიდის საშუალებით შეუერთდნენ. სომხეთის მხარეს წარმოადგენდნენ „კავკასიის ინსტიტუტის“ დირექტორი სერგეი მინასიანი და „ეროვნული და საერთაშორისო კვლევების სომხური ცენტრის“ დირექტორი მანველ სარგსიანი. აზერბაიჯანული მხრიდან დისკუსიაში მონაწილეობდნენ გაზეთ „ბაქო პოსტის“ რედაქტორი ქენან გულუზადე და „ჰუმანიტარული კვლევების საზოგადოების“ ხელმძღვანელი ავაზ ჰასანოვი.

ვიდეო დებატებს, რაც სომხებისა და აზერბაიჯანელებისთვის მოსაზრებების გაცვლის იშვიათ შესაძლებლობას წარმოადგენს, ესწრებოდნენ ჟურნალისტები და არასამთავრობო ორგანიზაციების წარმომადგენლები ერევნიდან.